BEZISTENI

Nëse niseni ta gjeni Bezistenin, atëherë përgatituni për një aventurë të vogël të eksplorimit të rrugicave të Çarshisë, sepse ai nuk mund të gjendet me të parën, për shkak të ndryshimeve që ka pësuar Çarshia dhe dyqaneve të shumta që janë shtuar gjatë kohës.

Fjala “bezisten” paraqet bashkim të fjalës persike “bezz” që do të thotë “pëlhurë” dhe fjalës arabe “stan” që do të thotë “vend për shitje” dhe vetë emri spjegon se bezisteni i Shkupit ka qenë i dedikuar ekskluzivisht për shitjen e pëlhurave.  Ky objekt masiv e impozant i tipit oriental gjendet në mes të Çarshisë së vjetër dhe nga të gjitha anët e rrethojnë dyqane.  Është në afërsi të Çifte hamamit dhe Suli Hanit. Funksioni i tij për shitblerje të pëlhurave me kalimin e kohës është zgjeruar edhe me forma të tjera të zejeve e tregtisë që janë zhvilluar brenda këtij objekti.