БЕЗИСТЕН

Ако сте тргнале да го пронајдете Безистен, тогаш подгответе се за една мала авантура на истражување низ уличките на Чаршијата, бидејќи нема да го најдете од прва, поради  промените низ кои поминала Чаршијата и многубројните дуќани основани низ времето.

Зборот „безистен„ претставува спој на персискиот збор „безз„ што значи „платно„, и арапскиот збор „стан„ што значи „место за продажба„, и самото име објаснува дека скопскиот Безистен бил наменет ексклузивно за продажба на платно.  Овој масивен и импозантент објект од ориентален тип се наоѓа среде Старата Чаршија и од сите страни го опкружуваат дуќани.  Се наоѓа во близина на Чифте амам и Сули ан.  Неговата функција за продажба на платно со минувањето на времето се проширила и со други форми на занаетчиство и трговија кои се развиле во рамките на овој објект.